For tilsette og elevar ved Øksnevad vid.g.skole Red. Arne Dragsund
Ryddedag.
Grunnkursklassane hadde ryddedag for utearealene på skolen 21. april i 5.og 6. time. Veret var fint for eit hyggeleg avbrekk i skoledagen.
Heildagsprøver.
Klasse 2 A , 2 B og 2 G hadde heildagsprøve i norsk med forberedelsetid 20.april. Klasse 3 N hadde heildagsprøve i naturfag 22.april.
Prosjektveke.
Klasse 2 G har prosjektveke ute i praksis heile veke 18. Dei skal ha eit arbeid på fotballbanen på Ålgård, og her på skolen skal elevane gjere alt klart med støyping av fundament for to ferister på vegen ved minkhuset.
Tevling på Øksnevad.
Rogaland BU skal ha tevling i mellom anna bruk av motorsag på gardsplassen på skolen laurdag 12. juni.
Idrettsdagen.
Skolen har idretts-og aktivitetsdag onsdag 5. mai. Det er sett opp mange tevlingar og aktivitetar denne dagen. Og det vert grilling av mat i parken.Vi vonar på godt ver den dagen. Også i år vert Rogaland Bygdeungdomslag med med sine tevlingar.
Parkering.
Skolen har eit system for parkering. Elevane har sine tilviste plassar, og tilsette har si parkering nedanfor skolebygningen og nedanfor den gamle driftsbygningen. Det er ikkje anledning til å parkere nede ved det nye grisehuset og stallen. Skilt vil bli sett opp der nede.
Ny skogbruksplan.
Øksnevad vgs. har fått ny skogbruksplan for skogen på skolen, utarbeidt av Skogeigarlaget Vest. Øksnevad har 602 da produktivt skogareal med ei total kubikkmasse på 7451 m3 , i snitt 12,4 m3 pr.dekar. Tilvekst i hogstklasse 3-5 ligg på 424 m3 . I snitt tilvekst 0,70 m3 pr. dekar, med 5,7% i snitt tilvekstprosent. Produksjonsevne totalt 511m3, pr. dekar 0,85 m3 .
Kommentarar til skogstilstanden seier m.a.: ” Skogen har ingen trekk som syner at den er usunn. Tilveksten er god og det er ein høg tilvekstprosent. Det er god fordeling på hogstklassane, med lite areal i hogstklasse 1. Dette tyder på at arealet vert sett snøgt i produksjon etter hogst. Det er ein del areal i hogstklasse 2 (plantefelt). Der det er nødvendig med rydding i ungskogen, vil dette som regel vere av dei mest lønsame tiltak i skogbruket”.
Nye datamaskinar til Øksnevad.
Ole Lauvås melder om at skolen har fått 30 datamaskinar, av desse 5 heilt nye, til utskiftning av maskinar på elevnettet i samband med overgangen til nytt system. Dette var ei flott omlegging som vi har fått mykje glede av allereide. Nå er desse maskinane sette inn i biblioteket, i klasserom og andre stader til bruk i undervisninga.
Besøk frå fylkeskommunen.
Ole Jan Olsen frå Opplæringsavdelinga og Ådn Njå frå fylkesbyggesjefen var på Øksnevad fredag 23.april. Dei hadde samtalar med rektor om ei vidareutbygging av Øksnevad med desse temaer:
• Ventilasjonsanlegget
• Guttegarderoben
• Fleirbruksbygget
Ein kombinasjon av utbetring av ventilasjonsanlegget i skolebygningen og ombygging av klasserom 11 og 12 samt kursrommet var og framme i samtalen. Ei arbeidsgruppe beståande av Sjur Ulvund, Oddmund Hognestad og Arne Dragsund skal nå lage ei plan for utbygging av skolen, både det som kjem under kvalitetsforbetrande tiltak og eigne prosjekt som t.d. fleirbruksbygget. Dette vil bli tatt med i skolebruksplanen for 2005.
Revisjon frå Klepp Kommune.
Miljøretta helsevern i Sør-Rogaland og folk frå Klepp Kommune, som har oppfølgingsansvaret for skolar i samband med Lov om miljøretta helsevern i skolar og barnehagar, var på Øksnevad 26. april. Møtet var ei oppsummering av det som var framme i revisjonen i fjor. Med på møtet var AMG på Øksnevad, rektor og Ragnvald Sande frå fylkesbyggesjefen.
Overnattingstur til Røssdalen.
Klasse 1 C saman med faglærar Geir Tjeltveit var på telttur til Røssdalen i Forsand 19.-20.04.04. Turen var ein del av faget naturbruk og friluftsliv. Av aktivitetar kan vi nemne: Sette opp telt, fyre bål, grille pølser, sosialt samvær. I det heile ein vellukka tur for dei 14 deltakarane, trass i regnveret.
Fagdag for reinhaldarar.
Det skal vere fagdag for reinhaldarar på hotell Alstor i Stavanger 7. mai. Aslaug Dahle, Vivian Flister, Zeyeneb Nur og Ellen Marie Skretting reiser frå Øksnevad.
Forebyggande undervisning i brannvern.
26. mai kl. 12.00 skal VK1 klassane og agronomklassen i VK2 ha undervisning i forebyggande brannvern. Dette er eit samarbeid mellom Direktoratet for samfunnssikkerhet og beredskap, Norsk brannvernforening og det lokale brannvesenet. Første delen vil handle om brannvern i landbruket.
Klauvskjeringskurs.
27. og 28.april arrangerte Tine Sør eit kurs i klauvskjering her på skolen med 13 deltakarar. Skolen fekk på denne måten gratis skjering av alle kyrne og god reklame.
Russen er i gang.
Russen kledde seg i russeklær 24. april, så nå er russetida i gang dette året. Oddbjørn Johnsen er russepresident på Øksnevad. Vi ønskjer russen lukke til med ei hektisk, men hyggeleg tid for russefeiring framover!
Vårvinna.
Pløyinga er i full gang, og naturgjødselen på enga er komen ut. Det vert nytta 2,5-5 tonn pr. dekar på enga, alt etter om det er slått eller beite. Den største mengde vert nytta til enga der ein skal ta ein 2.slått, og der blir det berre ei gjødsling, slik ein hadde gode erfaringar med i fjor. Dei første potetene er komne i jorda 28. april, økopoteter på det økologiske feltet.
Elles har det vore for blautt til å kome utpå åkrane den siste tida.
Beiteslepp.
Kvigene vart slepte ut på beite tysdag 27. april. Dei går på det såkalla Egobeitet. Dei sauene som har lamma har vore ute ei stund. I skrivande stund er det 15 søyer som ennå ikkje har lamma.
Sortsforsøk.
På Øvre Atlanteren skal det vere eit sortsforsøk med bygg i år. Det er Jæren Forsøksring som har ansvar for dette forsøket.
Salgstidene i veksthuset.
Det vert ope for salg i veksthuset alle kvardagar frå kl. 09.00 til 19.00, laurdag kl. 10.00-15.00. Nå står blomstene fine, og til greie prisar. Så ta turen innom veksthuset for ein god handel!
Fugletårnet i Lonaheia.
Kjell Stangeland og Hans Egil Hauge har reparert fugletårnet i Lonaheia, så nå er det trygt å bruke dette. Flott utsikt mot Lonavatnet!